អំពីមជ្ឈមណ្ឌលធម្មលដ្ឋិកា
«ធម្មលដ្ឋិកា» ដែលមានន័យថា «ឈើច្រត់ធម៌» ស្ថិតនៅនាភាគពាយព្យនៃប្រទេសកម្ពុជា, មានចម្ងាយប្រមាណ ១៨គម ពីក្រុងបាត់ដំបង។ មជ្ឈមណ្ឌលគ្របដណ្ដប់លើផ្ទៃដីប្រមាណជាង ៤ ហិចតា, ព័ទ្ធជុំវិញភ្នំទ្រុងមាន់។ មជ្ឈមណ្ឌលចាប់ដំណើរការតាំងពីខែមករា ឆ្នាំ ២០០៤ មក។
ធម្មសាលនៃមជ្ឈមណ្ឌលអាចទទួលសិស្សបានលើសពី ១៨០ នាក់ ហើយមជ្ឈមណ្ឌលអាចទទួលសិស្សឲ្យស្នាក់អាស្រ័យបានចំនួន ១៥០ រូប។ ក្នុងពេលបច្ចុប្បន្ន ជារៀងរាល់ឆ្នាំ មជ្ឈមណ្ឌលបើកវគ្គសិក្សា ១០ថ្ងៃ, សតិបដ្ឋាន, ២០ថ្ងៃ, ៣០ថ្ងៃ, ៣ថ្ងៃ និង វគ្គកុមារ។
ការធ្វើដំណើរទៅមជ្ឈមណ្ឌលវិបស្សនាធម្មលដ្ឋិកា
ពីរាជធានីភ្នំពេញ៖
មជ្ឈមណ្ឌលធម្មលដ្ឋិកា ស្ថិតក្នុងក្រុងបាត់ដំបង ដែលមានចម្ងាយប្រមាណ ២៩០គីឡូម៉ែត្រ ភាគពាយព្យនៃរាជធានីភ្នំពេញ តាមផ្លូវជាតិលេខ ៥ និង ប្រហែល ១៨គីឡូម៉ែត្រ ពីទីក្រុងបាត់ដំបង តាមផ្លូវជាតិលេខ ៥៧។
ពីភ្នំពេញ រថយន្តក្រុងនឹងនាំអ្នកទៅដល់មជ្ឈមណ្ឌលតែម្ដង ក្នុងតម្លៃប្រមាណ ៣០ ០០០ រៀល។ សូមហៅទូរសព្ទទៅលេខ ០១២ ៤០០ ៤៤១ ដើម្បីទទួលព័ត៌មានបន្ថែម។
សម្រាប់សិស្សទៅចូលរួមវគ្គសិក្សា៖ គឺនៅថ្ងៃចាប់ផ្ដើមវគ្គ (ថ្ងៃ០) តាមរយៈក្រុមហ៊ុន រិទ្ធិ មុនី ដឹកអ្នកដំណើរ។
សម្រាប់សិស្សបម្រើក្នុងវគ្គសិក្សា៖ គឺមួយថ្ងៃមុនថ្ងៃបើកវគ្គសិក្សា (១ថ្ងៃ មុនថ្ងៃ០) តាមរយៈក្រុមហ៊ុន រិទ្ធិ មុនី ដឹកអ្នកដំណើរ។
សូមបញ្ជាក់ប្រាប់គេថា យើងជាសិស្សវិបស្សនា ត្រូវចុះនៅខ្លោងទ្វារចូលទៅភ្នំទ្រុងមាន់ ហើយតម្លៃសំបុត្រ ៣០ ០០០ រៀល, តម្លៃនេះសម្រាប់តែសិស្សវិបស្សនាប៉ុណ្ណោះ។
ពីក្រុងសៀមរាប៖
ក្រុងបាត់ដំបងមានចម្ងាយប្រមាណ ១៧០ គីឡូម៉ែត្រ ពីក្រុងសៀមរាប។ មធ្យោបាយធ្វើដំណើរជាទូទៅគឺតាមរថយន្តក្រុងឆ្លងខេត្ត ឬក៏តាមរថយន្តឈ្នួលឯកជន។ សោហ៊ុយធ្វើដំណើរគឺប្រមាណ ៣ម៉ឺនរៀល តាមរថយន្តក្រុងឆ្លងខេត្ត និងប្រហែល ៣០ម៉ឺនរៀល តាមរថយន្តឈ្នួលឯកជន (តម្លៃឈ្នួលក្នុងមួយឡាន ដែលអ្នកអាចចែកគ្នាចេញបាន បើអ្នកធ្វើដំណើររួមគ្នាក្នុងឡានតែមួយ)។
ពីក្រុងបាត់ដំបង៖
មជ្ឈមណ្ឌលធម្មលដ្ឋិកា មានចម្ងាយប្រមាណ ១៨គីឡូម៉ែត្រ ពីទីប្រជុំជនក្នុងក្រុងបាត់ដំបង។ ប្រសិនបើធ្វើដំណើរតាមម៉ូតូឌុប ឬ រម៉កកង់បី គឺចំណាយសោហ៊ុយប្រមាណ ២ម៉ឺនរៀល។ សូមប្រាប់អ្នកបើកបរឲ្យដឹកអ្នកទៅមជ្ឈមណ្ឌលវិបស្សនា នៅភ្នំទ្រុងមាន់ ហួសភ្នំសំពៅ ប្រហែល ១គីឡូម៉ែត្រ។